နှုတ်ဆက်ပါသည်Google+

 အင်တာနက်အသုံးပြုသူအရေအတွက် မြင့်တက်လာသည်နှင့်အမျှကမ္ဘာ့နည်းပညာလောကတွင်Social Network (လူမှုရေးဝက်ဘ်ဆိုက်) များကလည်းပိုမိုနေရာယူလာနေကြသည်။အဓိကဆိုလိုရင်းကတော့လူမှုရေးဝက်ဘ်ဆိုက်များခေတ်စားလာသည်ပေါ့။ Facebook ၊Twitterစသည့် ၀က်ဘ်ဆိုက်များအောင်မြင်လာပြီးတစ်ကမ္ဘာလုံးအတိုင်းအတာဖြင့်Userအဖွဲ့ဝင်အရေအတွက်များပြားချိန်တွင်ဆန့်ကျင်ဘက်အားဖြင့်တဖြည်းဖြည်းလုံးပါးပါးလာနေသောဝက်ဘ်ဆိုက် (၀ါ) ကျရှုံးလာနေသောဝက်ဘ်ဆိုက် တစ်ခုကိုလည်း တွေ့မြင်နေရသည်။ထိုဝက်ဘ်ဆိုက်ကတော့အခြားမဟုတ်။နာမည်ကျော်နည်းပညာဘီလူးကြီးGoogle ၏Google + ပင်ဖြစ်တော့သည်။Google + သည်ရေပန်းစားမှုအရလုံလောက်သည့် အတိုင်းအတာအထိမရောက်ရှိခဲ့သလိုစီးပွားရေးအရလည်းကြေကွဲစရာကောင်းလောက်အောင်အရှုံးပေါ်ခဲ့ပြီးဖြစ်သည်။

Facebook ၊Twitter နှင့်အခြားလူမှုရေးဝက်ဘ်ဆိုက်များ၏ ပြိုင်ဘက်အဖြစ် ရပ်တည်နိုင်ရန်ရည်ရွယ်ချက်ဖြင့်Google + ကိုGoogle ကအကောင်အထည်ဖော်ခဲ့ခြင်းဖြစ်သည်။ဖန်တီးခဲ့ခြင်းဖြစ်သည်။သို့သော်လက်ရှိတွင်Google + ကိုယင်းတို့ကိုယ်တိုင်မြေမြုပ်သဂြိုဟ်ရမည့်ကိန်းပင် ဆိုက်နေလေပြီ။ တကယ်တမ်းလည်းလက်လျှော့အရှုံးပေးနေရလေသည်။ Google + ကိုထိန်းချုပ်ကိုင်တွယ်ရေးအတွက်ယခုနှစ်ဆန်းပိုင်းက တာဝန်ပေးအပ်ခြင်းခံခဲ့ရသောBrad Horowitz ကတော့ပြီးခဲ့သော ဇူလိုင်လ၊၂၇ရက်နေ့ကGoogle၏User များအနေဖြင့်ကုမ္ပဏီ၏ ၀န်ဆောင်မှုအသီးသီးသို့ ၀င်ရောက်လိုပါက Google+တွင်အကောင့်ဝင်ရန် မလိုအပ်တော့ကြောင်း အတည်ပြုကြေညာခဲ့သည်။ အမှန်တကယ်လည်း မထင်မရှားလူမှုရေးဝက်ဘ်ဆိုက်Google+၏အရေးပါအရာရောက်မှုမှာသြဂုတ်လ၁ရက်နေ့အရောက်တွင်အဆုံးသတ်သွားခဲ့တော့သည်။Google+အစားGoogle email တစ်ခုရှိထားခြင်းဖြင့်Google ၏ဝန်ဆောင်မှုအားလုံး ကို မွှေနှောက်အသုံးပြုသွားနိုင်တော့မည်ဖြစ်သည်။

ဗဟိုထိန်းချုပ်မှုစနစ်ဖြင့်Google+လွန်ခဲ့သော၄နှစ်က Google + ကိုစတင်မိတ်ဆက်ကြေညာခဲ့စဉ်က ွသသါူနကုမ္ပဏီထံတွင်မျှော်လင့်ချက်များဖြင့် ပြည့်ဝနေခဲ့ဖူးသည်။ပုံမှန်ဝင်ရောက်အသုံးပြုသူတစ်ဘီလီယံဝန်းကျင်ရှိသောUserများနှင့်အတူစည်ပင်ဖွံ့ဖြိုးသောလူမှုရေးဝက်ဘ်ဆိုက်Google+ဖြစ်လာရန်မျှော်လင့်ခဲ့ကြသည်။Userသန်းပေါင်းများစွာကGoogle+သို့ နေ့စဉ်ဝင်ရောက်ကာStatusများရေးသားခြင်း၊ဓာတ်ပုံများတင်ပြခြင်း၊မိသားစုဝင်များ၊မိတ်ဆွေသူငယ်ချင်းများ၊လုပ်ဖော်ကိုင်ဖက်များနှင့်ထိတွေ့စကားပြောခြင်းစသည်တို့ကိုတွေ့ရလိမ့်မည်ဟုလည်းယုံကြည်ထားခဲ့ကြသည်။တစ်နည်းအားဖြင့်တော့Google+ကိုမျှဝေခံစားနိုင်သောGoogle၏ဝန်ဆောင်မှုမော်ဒယ်များအားလုံးကိုစုစည်းပေးမည့်ပလက်ဖောင်းအလွှာတစ်ခုအဖြစ်ယူဆခဲ့ကြခြင်းဖြစ်သည်။

မစ္စတာHorowitzက“Google+ဟာကျွန်တော်တို့ကောင်းစွာစိတ်ညွှတ်ထားတဲ့ရည်မှန်းချက်ပန်းတိုင်တစ်ခုဖြစ်ခဲ့ပါတယ်။ဒါပေမယ့်Google+ဟာUser တွေရဲ့စိတ်ကိုများသောအားဖြင့်ရှုပ်ထွေးစေနိုင်ပြီးအဖွဲ့ဝင်အရေအတွက်တိုးတက်မလာခဲ့ပါဘူး”ဟုဆိုသွားခဲ့သည်။ရှုပ်ထွေးသည်ဆိုရာတွင်မည်သည့်ဝန်ဆောင်မှုကိုအသုံးပြုသည်ဖြစ်စေ၊Google+အကောင့်တစ်ခုမဖြစ်မနေပြုလုပ်ရမည့်လိုအပ်ချက်ရှိနေခြင်းပင်ဖြစ်သည်။Google ကအရာအားလုံးကိုလူမှုရေးကွန်ရက်Google+နှင့်ထိန်းချုပ်လိုက်ပါက သေချာပေါက်အဖွဲ့ဝင်အရေအတွက်တိုးတက်များပြားလာမည်ဟုအပိုင်ယူဆထားပုံရသည်။သို့သော်တကယ်တမ်းတွင်မူယင်းသို့ထိန်းချုပ်ခြင်းကGoogle ပရိသတ်များအတွက်စိတ်ရှုပ်ဒေါသထွက်စရာသာ ဖြစ်ခဲ့ရလေသည်။

Googleပရိသတ်များပေါက်ကွဲခဲ့ကြသည့်အချက်ကတော့YouTube နှင့်ပတ်သက်၍ဖြစ်သည်။၂၀၁၃ခုနှစ် နှောင်းပိုင်းမှစ၍YouTubeတွင်Comments စာသားများရေးသားရန်နှင့်ဗီဒီယိုများUploadတင်ခွင့်ရရန်အတွက်Google+အကောင့်လိုအပ်မည်ဖြစ်ကြောင်းကြေညာခဲ့ရာတွင်သာမန်UserများသာမကYouTube ကိုပူးတွဲတည်ထောင်သူတစ်ဦးဖြစ်သောJawed Karim ကပင်လျှင် သူ၏YouTube စာမျက်နှာပေါ်၌ပျစ်ပျစ်နှစ်နှစ်ဆဲဆိုရေးသား ထားခဲ့သေးသည်။သို့ရာတွင်Google ၏စီအီးအိုLarry Page ၏အမြင်တွင်Google+ကအားလုံးကိုထိန်းချုပ်ပဲ့ကိုင်စေနိုင်မည်ဟုတစ်သမတ်တည်းယုံကြည်နေခဲ့လေသည်။Google၏ဝန်ဆောင်မှုတော်တော်များများနှင့်User များမလွတ်မကင်းနိုင်ဘဲရှိသည်ကိုသိရှိထားပြီးသောစီအီးအိုLarry Pageသည်ဓာတ်ပုံတင်မည်လား၊သတင်းအချက်အလက်တင်မည်လား၊မိတ်ဆွေအပေါင်းအသင်းများနှင့်Chattingထိုင်မည်လား၊ဘာကိုပဲလုပ်လုပ်Google+အကောင့်ရှိမှသာလုပ်ဆောင်ခွင့်ရမည့်ဗဟိုထိန်းချုပ်စနစ်ကိုစတင်အသက်သွင်းခဲ့ခြင်းလည်းဖြစ်သည်။

အထင်နှင့်အမြင်ကွဲလွဲခဲ့သောGoogle“Facebook, Twitterတို့လို ကြီးမားကျယ်ပြန့်တဲ့လူမှုရေးဝက်ဘ်ဆိုက်မျိုးကိုဖန်တီးနိုင်လိုက်ပြီဆိုရင်သူတို့ရဲ့အင်အားကလည်းကြီးထွားလာမယ်လို့Googleကထင်ထားခဲ့တာလေ။နောက်ဆုံးတော့Googleဟာဘယ်လိုကုမ္ပဏီအမျိုးအစားလဲဆိုတာသူတို့ကိုယ်တိုင်နားလည်သွားကြပြီပေါ့ဗျာ”ဟုဆိုသွားခဲ့သူကတော့လူမှုရေးဝက်ဘ်ဆိုက်များ၏သတင်းအချက်အလက်နှင့်စစ်တမ်းကောက်ယူသည့်4C insights အဖွဲ့အစည်း၏မားကက်တင်းအကြီးအကဲAaron Goldman ပင်ဖြစ်သည်။Google+၏အကြီးအကဲဟောင်းဖြစ်သူVic Gundotraပြန်ပြောင်းပြောခဲ့သည့်စကားကတော့စိတ်ဝင်စားစရာကောင်းနေသည်။၎င်းက“၂၀၁၃ခုနှစ် နှောင်းပိုင်းမှာGoogle+ကိုလစဉ်ဝင်ရောက်အသုံးပြုတဲ့Userအရေအတွက်ကသန်း၃၀၀အထိရှိထားပြီးပါပြီ။ဒီအချိန်မှာFacebookကတော့လစဉ်အသုံးပြုသူပေါင်းတစ်ဘီလီယံကျော်နေပါပြီ။ပုံမှန်အနေအထားအတိုင်းစောင့်ကြည့်မယ်ဆိုရင်FacebookကိုGoogle+ကလိုက်မီကောင်းမီနိုင်ပါတယ်။ဒါပေမယ့်Google+User တွေရဲ့လှုပ်ရှားမှုတွေအပေါ်Googleရဲ့တောင်းဆိုမှုတွေကများပြားလွန်းခဲ့လို့အခုလိုကျရှုံးသွားခဲ့ရတာပါ”ဟုဆိုခဲ့ခြင်းဖြစ်သည်။ယခုတော့Google+ကိုလည်းချောင်ထိုးကြရတော့မည်ဖြစ်သည်။

နည်းမှန်လမ်းမှန်ဖြင့်လျှောက်လှမ်းခဲ့သောFacebookကလက်ရှိတွင်လစဉ်အသုံးပြုသူ၁.၄ဘီလီယံဖြင့်အအောင်မြင်ဆုံးနေရာ၌ရပ်တည်နေချိန်တွင်Google+ကတော့မထင်မရှားအခြေအနေမျိုးဖြင့်ပရိသတ်မြင်ကွင်းမှကွယ်ပျောက်သွားတော့မည်ဖြစ်သည်။ထိုအကြောင်းကိုလက်ရှိGoogle+ကြီးကြပ်အုပ်ချုပ်သူHorowitz ကအတည်ပြုခဲ့ပြီဖြစ်သည်။Horowitz ၏အဆိုအရSPS ဟုအတိုကောက်အမည်ပေးထားသော၎င်း၏အဖွဲ့နှင့်အတူGoogle+ ၏တာဝန်များကိုခွဲဝေစိတ်ဖြာပစ်လိုက်တော့မည်ဟုဆိုထားခဲ့သည်။

အခြားလူမှုရေးဝက်ဘ်ဆိုက်များကဲ့သို့Google+မှာဓာတ်ပုံများ၊ဗီဒီယိုများကိုစုပေါင်းလက်ခံတော့မည်မဟုတ်ဘဲSPS ခေါ်Streams၊Photos နှင့်Sharingအစိတ်အပိုင်းများကခွဲဝေထားသောတာဝန်များအရသာလက်ခံနိုင်တော့မည်ဖြစ်သည်။ဥပမာအားဖြင့်ဓာတ်ပုံနှင့်ဗီဒီယိုသိမ်းဆည်းခြင်း၊တင်ပြခြင်းများကိုလက်ခံပြုလုပ်ပေးမည့်Google Photosကိုယခု၂၀၁၅ခုနှစ်အစောပိုင်းတွင် စတင်မိတ်ဆက်ခဲ့ပြီးဖြစ်သည်။ ထို့ကြောင့်Google User များအနေဖြင့်ဓာတ်ပုံ၊ဗီဒီယိုများနှင့်ပတ်သက်ပြီး ပြင်ဆင်ပြောင်းလဲမှုလုပ်လိုပါကGoogle+ အကောင့်လိုအပ်တော့မည်မဟုတ်ဘဲGoogle Photos ကိုတိုက်ရိုက်သွားရောက်နိုင်တော့မည်ဖြစ်သည်။ထို့အပြင်Google အသုံးပြုသူတစ်ဦးအနေဖြင့်၎င်းတည်နေရာကဲ့သို့သတင်းအချက်အလက်တစ်ခုခုကိုShare လုပ်လိုက်လျှင်လည်းMessaging and Video-Chat Service Hangoutsကဲ့သို့နေရာကိုကူးပြောင်းဝင်ရောက်သွားမည်ဟု ဆိုသည်။

နောက်ဆုံးအနေဖြင့်Googleက ပြတ်ပြတ်သားသားကြေညာလိုက်သည့်အချက်ကတော့သင့်အနေဖြင့်Google၀န်ဆောင်မှုများနှင့်ပတ်သက်၍မည်သည့်အရာကိုပဲလုပ်သည်ဖြစ်စေ၊Google+ အကောင့်မလိုအပ်တော့ဘဲ Google Mailကဲ့သို့ အကောင့်တစ်ခုတည်းကိုသာလိုအပ်တော့မည် ဟူ၍ပင်။စာသားများမျှဝေသည်ဖြစ်စေ၊တစ်ဦးနှင့်တစ်ဦးပြောဆိုဆက်သွယ်သည်ဖြစ်စေ၊Youtube Channel တစ်ခုကိုကိုယ်တိုင်ဖန်တီးပြီးဗီဒီယိုများ တင်ပြသည် ဖြစ်စေ၊အားလုံးကိုသာမန်Googleအကောင့်တစ်ခုတည်းဖြင့်ဆောင်ရွက်နိုင်တော့မည်ဖြစ်သည်။သို့ဆိုလျှင်Userများဘက်ကလည်းနှုတ်ဆက်ပါသည်Google+ ဟုသာပြောလိုက်ရုံသာရှိတော့သည်။

Ref : (Google Gives Up on Google+ as a Facebook Rival - by ALISTAIR BARR)

Ledian
Mobile Guide Journal ( Every Monday )

Source: Mobile Guide Journal



Posted By

<<  Zaw Lay  >>

Ko Ko Zaw ( BE-EC )     www.htarwaiethar.org