Cracker ဖြစ်ချင်သူများအတွက် Myanmar Cracking Team

ကျွန်တော် ဒီတစ်ခါတော့ Myanmar Cracking Team လေး အကြောင်းကို ဘလော့ဂ်မှာ ရေးသားလိုက်ပါတယ်။

Myanmar Cracking Team နဲ့ ကျွန်တော်က အဆက်စပ်တွေရှိပါတယ်။

ကျွန်တော် ဘလော့ဂ်မရေးခင် ကာလမှာ ကျွန်တော် အင်တာနက်မှာ မွှေနှောက်ရင်းနဲ့ Myanmar Cracking Team ကို တွေ့မိပြီး စိတ်ဝင်စားစွာလေ့လာမိပါတယ်။

အခုချိန်ထိတော့ ကျွန်တော်က ဘာမှ ဖြစ်ဖြစ်မြောက်မြောက်တော့ မရှိသေးပါဘူး။

အလုပ်က တစ်ဖက်နဲ့မို့ ရတဲ့အချိန်လေးမှာ လေ့လာစရာ အနည်းငယ်ကိုပဲ လေ့လာနိုင်ပါတယ်။

ကျွန်တော် ဘလော့ဂ်စရေးတော့ ကပေါက်ကခြာ အတော်ကို နိုင်ပါတယ်။

ဘာကို ရေးရမှန်းမသိ၊ နည်းပညာလိုလို၊ ဆော့ဝဲလ်တွေပဲ ရေးရမလိုလိုနဲ့ အတော်ကို တိုင်ပတ်ပါတယ်။

အဲ့မှာ ကျွန်တော် ကို rhythm ( Myanmar Cracking Team ) ရဲ့ အကူညီတောင်းကြည့်မှ ကျွန်တော် ဘလော့ဂ်ကို ဘာအကြောင်းရေးရင် ကျွန်တော့်အတွက် ပိုသင့်တော်မယ်ဆိုတာ သိလာတာပါ။


Myanmar Cracking Team ရဲ့ လိပ်စာက

http://www.mmcrackingteam.org   ပဲ ဖြစ်ပါတယ်။ အဲ့ဒီဆိုက်ကတော့ Public Website ပေါ့နော့်။


အသင်းဝင်အနေနဲ့ Cracking ပညာရပ်များကို လေ့လာလိုပါက Myanmar Cracking Team Forum မှာ အသင်းဝင်နိုင်ပါတယ်။

ဖိုရမ်လိပ်စာက

http://www.myanmarcrackingteam.net/  ပဲ ဖြစ်ပါတယ်။


ကျွန်တော် Myanmar Cracking Team ၏ သဘောထားများကို ဗဟုသုတ အနေနှင့် မူရင်းအတိုင်းရေးပေးလိုက်ပါတယ်။


"
Myanmar Cracking Team ကို တည်ထောင်တာ တစ်နှစ်ပြည့်မြောက်တဲ့အချိန်မှာတော့ Myanmar Cracking Team အနေနဲ့ team ရဲ့ သဘောထားတွေကို အများသူငှာ သိရှိစေဖို့ အနည်းငယ် ရှင်းပြလိုပါတယ်။

(၁) Team ကို ဘာရည်ရွယ်ချက်နဲ့ ဖွဲ့စည်းခဲ့သလဲ။

ကျွန်တော်တို့ မြန်မာပြည်မှာ မြန်မာလို ရေးသားဆွေးနွေးနိုင်တဲ့ cracking နဲ့ ပတ်သက်တဲ့ team တစ်ခု ရှိသင့်တယ်ထင်လို့ ကျွန်တော်တို့ အနေနဲ့ စုပေါင်းပြီး Myanmar Cracking Team ကို ထူထောင်ရခြင်း ဖြစ်ပါတယ်။

(၂) ဘယ်လိုဆော့ဖ်ဝဲလ်မျိုးတွေကို ခရက်လုပ်သလဲ။

ဘယ်လိုဆော့ဖ်ဝဲလ်မျိုးတွေကို ခရက်လုပ်သလဲဆိုတာကတော့ လက်ရှိ team member အရေအတွက် နည်းသေးတာကြောင့် တစ်ခုတည်းသောမူကိုတော့ ချမှတ်နိုင်ခြင်း မရှိသေးပါဘူး။ လောလောဆယ် Release ကဏ္ဍမှာ အောက်ပါအချက်များနဲ့ ညီညွတ်ရင် ခရက်လုပ်ပါတယ်။

    အွန်လိုင်းတွင် ခရက်ဖိုင် မရှိသေးခြင်း၊
    ခရက်လုပ်ရခက်သည့် ဆော့ဖ်ဝဲလ်ဖြစ်ခြင်း၊
    ခရက်လုပ်ခြင်း အရည်အသွေးကို တက်စေသည့် ဆော့ဖ်ဝဲလ်ဖြစ်ခြင်း၊
    သုံးစွဲသူအတွက် အသုံးတည့်သော ဆော့ဖ်ဝဲလ်ဖြစ်ခြင်း၊
    ကျူတိုရီရယ်သင်ခန်းစာများတွင် နမူနာအဖြစ်သုံးပြထားသော ဆော့ဖ်ဝဲလ်ဖြစ်ခြင်း၊
    ခရက်ကာကိုယ်တိုင် ခရက်လုပ်လိုသော ဆန္ဒရှိသည့် ဆော့ဖ်ဝဲလ်ဖြစ်ခြင်း၊
    Cracking Team များတွင် ခရက်ကာများမှ ခရက်လုပ်ရန်အတွက် အကြံဉာဏ်တောင်းခံထားသော ဆော့ဖ်ဝဲလ်ဖြစ်ခြင်း။

တစ်ခါတရံမှာတော့ ပို့စ်အရေအတွက် တက်အောင် လွယ်ကူတဲ့(အသုံးတည့်တဲ့) ဆော့ဖ်ဝဲလ်တွေကို ချွင်းချက်အနေနဲ့ ခရက်လုပ်ပါတယ်။ Team မှာ မန်ဘာအရေအတွက် နည်းပါးသေးတာကြောင့် အချို့မန်ဘာတွေဟာလည်း ခရက်လုပ်ဖို့ အချိန်အားလပ်ခြင်း မရှိသေးတာကြောင့် ခရက်လုပ်ဖို့ အလွန်ခက်တဲ့ ဆော့ဖ်ဝဲလ်တွေကို ခရက်လုပ်နိုင်ခြင်း မရှိသေးပါဘူး။ ဒီလိုဆော့ဖ်ဝဲလ်တွေကို ခရက်လုပ်မယ်ဆို အနည်းဆုံး ၂ပတ်ကနေ တစ်လလောက် အချိန်ပေးရမှာဖြစ်ပါတယ်။

(၃) ခရက်ဖိုင် တောင်းခံလို့ ရပါသလား။

လောလောဆယ်မှာတော့ မန်ဘာအင်အား နည်းပါးသေးတာကြောင့် ခရက်ဖိုင် တောင်းခံခွင့် မရှိသေးပါဘူး။ အပေါ်မှာဆိုခဲ့သလို ခရက်ဖိုင် တောင်းခံတာဟာ အွန်လိုင်းမှာ ခရက်မရှိလို့ ဖြစ်ပါတယ်။ ခရက်မရှိတာဟာ ဆော့ဖ်ဝဲလ်ဟာ အသုံးနည်းတာကြောင့်သော်လည်းကောင်း၊ ခရက်လုပ်ဖို့ ခက်တာကြောင့်သော်လည်းကောင်း ဖြစ်နိုင်ပါတယ်။ တကယ်လို့ ခရက်လုပ်ရခက်တဲ့ ဆော့ဖ်ဝဲလ်ကို တောင်းခံလာရင် ကျွန်တော်တို့အနေနဲ့ ဒီဆော့ဖ်ဝဲလ်ကို ခရက်လုပ်ဖို့ လနဲ့ချီပြီး အချိန်မပေးနိုင်သေးပါဘူး။ တစ်ခါတရံမှာတော့ မြန်မာဖိုရမ်အချို့မှာ မန်ဘာအချို့က တောင်းခံထားတဲ ဆော့ဖ်ဝဲလ်အချို့ကိုတော့ ကျွန်တော်တို့ ဆန္ဒရှိရင် ခရက်လုပ်ပါမယ်။ Myanmar Cracking Team မှာ ခရက်လုပ်ဖို့ တောင်းခံလာရင်တော့ ဘယ်ဆော့ဖ်ဝဲလ်ကိုမှ ခရက်လုပ်ပေးမှာ မဟုတ်ပါဘူး။ သင့်အနေနဲ့ သိထားရမှာက သင်ခရက်စေချင်တဲ့ ဆော့ဖ်ဝဲလ်ထက် ကျွန်တော်တို့ ခရက်လုပ်ဖို့ ဆန္ဒရှိတဲ့ ဆော့ဖ်ဝဲလ်ကိုသာ ခရက်လုပ်ပါတယ်။

(၄) ပြည်တွင်းဖြစ်ဆော့ဖ်ဝဲလ်တွေကိုကော ခရက်လုပ်မှာပါသလား။

ပြည်တွင်းဖြစ်ဆော့ဖ်ဝဲလ်တွေကိုတော့ ကျွန်တော်တို့အနေနဲ့ ခရက်လုပ်ပါတယ်။ ဘယ်လိုရေးထားသလဲဆိုတာ သိချင်လို့ပါ။ ပြည်တွင်းက ပရိုဂရမ်မာတွေရဲ့ အရည်အသွေးကို သိချင်လို့လည်း ပါပါတယ်။ ဒါပေမယ့် တွေ့ရှိတဲ့ အားနည်းချက်ကိုတော့ ဘယ်တော့မှ ထုတ်ဖော်မှာ မဟုတ်ပါဘူး။ ခရက်လုပ်ထားတဲ့ဖိုင်ကိုလည်း ဘယ်ဆိုက်မှာမှ တင်မှာ မဟုတ်ပါဘူး။ ချွင်းချက်အနေနဲ့ ဆော့ဖ်ဝဲလ် developer က team ကို ခရက်လုပ်ဖို့ စိန်ခေါ်ခဲ့ရင်ပဲဖြစ်ဖြစ်၊ သူတို့ဆော့ဖ်ဝဲလ်ဟာ ခရက်လုပ်ဖို့ရာ ဘယ်လိုမှ မဖြစ်နိုင်ပါဘူးလို့ ပြောဆိုခဲ့ရင်ပဲဖြစ်ဖြစ် ဒီဆော့ဖ်ဝဲလ်ရဲ့ခရက်ကို တင်ပေးမှာဖြစ်ပါတယ်။ (ဆော့ဖ်ဝဲလ်ကိုတော့ တင်ပေးမှာ မဟုတ်ပါ။)

(မှတ်ချက်။ အစိုးရ ခွင့်ပြုချက် မရှိဘဲ တရားမဝင် ထွက်ရှိတဲ့ ပြည်တွင်းဖြစ်ဆော့ဖ်ဝဲလ်တွေရဲ့ အားနည်းချက်ကိုတော့ ဖော်ထုတ်ကောင်း ဖော်ထုတ်ပါမယ်။ ဒါပေမယ့် ခရက်ဖိုင်ကို ဆိုက်မှာ တင်ပေးမှာ မဟုတ်ပါဘူး)

(၅) ဆိုက်မှာ မန်ဘာအဖြစ် ဝင်ရောက်နိုင်ပါသလား။
ကျွန်တော်တို့ထက် တော်သည်ဖြစ်စေ၊ ညံ့သည်ဖြစ်စေ မြန်မာ cracking လောကကို တိုးတက်စေလိုသော ဆန္ဒရှိလျှင်၊ Myanmar Cracking Team တွင် သိရှိထားလိုသည်များကို မျှဝေပေးလိုသော ဆန္ဒရှိလျှင် မည်သူမဆို ကျွန်တော်တို့ team ကို ဝင်ရောက်နိုင်ပါတယ်။ ဆွေးနွေးနိုင်ပါတယ်။ ပို့စ်တင်ခြင်းမရှိတဲ့ မန်ဘာတွေကိုတော့ လက်မခံသေးပါဘူး။ မန်ဘာအနေနဲ့ ဝင်ရောက်လိုရင် thandana.cu@gmail.com (သို့) rhythm.myanmarcrackingteam@gmail.com သို့ ဆက်သွယ်နိုင်ပါတယ်။

(၆) မန်ဘာအနေနဲ့ ဝင်ရောက်ဆွေးနွေးရင် ဘယ်လိုအကျိုးကျေးဇူးတွေ ရရှိမှာလဲ။

Team ဟာ ငွေရေးကြေးရေးအတွက် ရည်ရွယ်ပြီး ဖွဲ့စည်းထားတာ မဟုတ်တဲ့အတွက် သင့်အနေနဲ့ team ထံကနေ ဘာအကျိုးအမြတ်မှ ရရှိမှာ မဟုတ်ပါဘူး။ အခြား team တွေနဲ့ ယှဉ်ပြိုင်ဖို့အတွက် ထုတ်ဝေတဲ့ သိသင့်သိထိုက်တာလေးတွေကိုတော့ မန်ဘာတွေကသာ ဖတ်ရှုနိုင်မယ့် အခွင့်အရေးကိုတော့ သင်ရရှိမှာဖြစ်ပါတယ်။ (မည်သူ့ကိုမှ ပညာ မဝေမျှလိုတဲ့ အကျင့်ပျက် ခရက်ကာတွေရှိတဲ့အတွက် အချို့သော လျှို့ဝှက်ချက်တွေကို team မန်ဘာများအတွက်သာ ရှယ်ယာလုပ်ခြင်း ဖြစ်ပါတယ်။)

(၇) Cracking skill တော့ နည်းပါသေးတယ်။ မန်ဘာအဖြစ် လက်ခံမှာပါလား။

ကျွန်တော်တို့လည်း cracking skill သိပ်မရှိသေးပါဘူး။ နိုင်ငံတကာက ခရက်ကာတွေနဲ့ နှိုင်းယှဉ်ရင် မိုးနဲ့မြေလို ကွာပါသေးတယ်။ ဘာကြောင့်လည်းဆိုတော့ ကျွန်တော်တို့အနေနဲ့ အပြောကျယ်တဲ့ cracking လောကမှာ အကြောင်းအရာတစ်ခုတည်းကို သတ်သတ်မှတ်မှတ် မလေ့လာနိုင်သေးလို့ပါ။ မန်ဘာအဖြစ် လက်ခံဖို့အတွက်ကတော့ cracking skill နည်းခြင်း၊ မနည်းခြင်းဟာ အဓိက မကျဘဲ သိရှိထားသမျှကို မျှဝေပေးလိုတဲ့ ဆန္ဒကသာ အဓိကကျပါတယ်။ သင်ဟာ ခုချိန်မှာ newbie ဖြစ်ပေမယ့် နောင်တစ်ချိန်မှာ super cracker ဖြစ်လာနိုင်ပါတယ်။

(၈) သူများခရက်ဖိုင် rip လုပ်ခြင်းကို လက်ခံပါသလား။

Repost လုပ်ခြင်း (သူများခရက်လုပ်ထားသောဖိုင်ကို မိမိခရက်ဖိုင်အမည်ဖြင့် ပြောင်းလဲခြင်း)၊ RIP လုပ်ခြင်း (သူများခရက်လုပ်ထားသော ကုဒ်များအား ပြင်ဆင်အသုံးချခြင်း) ကို လုံးဝ(လုံး) လက်မခံပါ။ ခရက်ကာလောကမှာ ဒီကိစ္စဟာ အပြစ်အကြီးဆုံး ဖြစ်ပါတယ်။ သူများ ဘယ်လိုခရက်လုပ်သလဲဆိုတာ သင့်အနေနဲ့ လွတ်လွတ်လပ်လပ် ကြည့်ရှုလေ့လာနိုင်ပါတယ်။ တကယ်လို့ Rip လုပ်ခဲ့သည်ရှိသော် ဘယ်သူ ခရက်လုပ်ထားတဲ့ကုဒ်ကို ကူးချထားကြောင်း မှတ်ချက်နှင့်တကွ ဝန်ခံပေးပါ။ Request လုပ်ထားတဲ့ ဆော့ဖ်ဝဲလ်တွေမှအပ ကျန်ဆော့ဖ်ဝဲလ်တွေရဲ့ ခရက်ကို rip လုပ်တာကို team အနေနဲ့ လုံးဝ လက်ခံမှာ မဟုတ်ပါဘူး။  ဆော့ဖ်ဝဲလ်တစ်ခုကို ခရက်မလုပ်နိုင်တာဟာ ရှက်စရာမဟုတ်ပါဘူး။ RIP လုပ်တာကသာ ရှက်စရာ ဖြစ်ပါတယ်။ တကယ်လို့ repost လုပ်ခဲ့ရင်၊ credits မပေးဘဲ rip လုပ်ခဲ့ရင် team မန်ဘာအဖြစ်ကနေ ရာသက်ပန် ထုတ်ပယ်ခံရပါလိမ့်မယ်။

(၉) အခြား team က ဖြန့်ချီတဲ့ ခရက်ဖိုင်တွေကိုကော ရှယ်ယာပေးလို့ရပါသလား။

Cracking tool ကဏ္ဍကလွဲလို့ ကျန်တဲ့ကဏ္ဍတွေမှာ အခြားအခြားသော team တွေက ခရက်လုပ်ထားတာကို တင်ခွင့်မရှိပါဘူး။ Myanmar Cracking Team ဟာ Warez ဖိုရမ်မဟုတ်ပါဘူး။ ဆော့ဖ်ဝဲလ်ရှာဖွေရေးဆိုက် မဟုတ်ပါဘူး။ တကယ်လို့ Our Releases ကဏ္ဍမှာ ကျွန်တော်တို့ ခရက်လုပ်ထားတဲ့ဆော့ဖ်ဝဲလ်နဲ့ တိုက်ဆိုင်ခဲ့ရင် မှတ်ချက်အနေနဲ့ အခြား team တွေက ခရက်လုပ်ထားတဲ့ဖိုင်ကို တင်ပေးလို့ ရပါတယ်။

(၁၀) Team က ထုတ်တဲ့ ခရက်ဖိုင်တွေကို အခြားဖိုရမ်တွေမှာ ရှယ်ယာခွင့်ပြုပါသလား။

ဘယ်ခရက်ဖိုင်ကိုမဆို လွတ်လွတ်လပ်လပ် ရှယ်ယာလုပ်နိုင်ပါတယ်။ Myanmar Cracking Team ထံ ခွင့်တောင်းစရာမလိုသလို credits လည်း ပေးစရာမလိုပါဘူး။ ဘာကြောင့်လည်းဆိုတော့ ကျွန်တော်တို့ရဲ့ ခရက်တွေ၊ patch ဖိုင်တွေမှာ ကျွန်တော်တို့ရဲ့ အမှတ်အသားတွေ ထည့်ပေးလိုက်လို့ဖြစ်ပါတယ်။

(၁၁) Team က ထုတ်တဲ့ ခရက်ဖိုင်တွေကို Anti-virus တွေက trojan လို့ပြနေပါတယ်။

တစ်ခါတရံမှာတော့ ကျွန်တော်တို့ ဘယ်လိုခရက်လုပ်ထားတယ်ဆိုတာ မသိနိုင်အောင် ခရက်ဖိုင်ကို cryptor ဆော့ဖ်ဝဲလ်တွေနဲ့ protect လုပ်လိုက်ပါတယ်။ ဒီအခါ virus/trojan တွေနဲ့ signature (binary) ချင်း သွားတူပါတယ်။ ယုံကြည်စိတ်ချစွာ အသုံးပြုတာ မပြုတာက သင့်အပေါ်မှာပဲ မှီခိုပါတယ်။

(၁၂) အချို့ ခရက်ဖိုင်တွေဟာ ကောင်းကောင်း အလုပ်မလုပ်ပါဘူး။ ဘာဖြစ်လို့ပါလဲ။

ကျွန်တော်တို့ ခရက်လိုက်တဲ့ ခရက်တိုင်းဟာ စင်းလုံးချော ဖြစ်ချင်မှ ဖြစ်ပါမယ်။ ဘာကြောင့်လည်းဆိုတော့ ကျွန်တော်တို့အနေနဲ့ ဆော့ဖ်ဝဲလ်တစ်ခုကို ခရက်လုပ်တဲ့အခါမှာ အချိန်အများကြီး မပေးနိုင်လို့ ဖြစ်ပါတယ်။ အထူးသဖြင့် ဆော့ဖ်ဝဲလ်ကြီးတွေမှာနဲ့ registration ကို အကြိမ်ကြိမ် စစ်ဆေးတဲ့ ဆော့ဖ်ဝဲလ်တွေမှာ ဒီလို ခရက်မလုပ်တဲ့ ပြဿနာတွေ ရှိနိုင်ပါတယ်။ အလားတူ Windows 7 64 bit Edition တွေမှာလဲ ခရက်မလုပ်တာ ကြုံရနိုင်ပါတယ်။ ဘာကြောင့်လည်းဆိုတော့ ကျွန်တော်တို့ရဲ့ ခရက် အလုပ် လုပ်၊ မလုပ်ကို Windows XP SP3 နဲ့ Windows 7 SP1 တို့မှာပဲ စမ်းသပ်ထားလို့ ဖြစ်ပါတယ်။ တကယ်လို့ စင်းလုံးချော ခရက်ကို ရချင်တယ်ဆိုရင်တော့ တွေ့ကြံုရတဲ့ error တွေကို သက်ဆိုင်ရာတော့ပစ်အောက်မှာ ဖော်ပြပေးပြီး ပူးပေါင်းပါဝင်ပေးနိုင်ဖို့ မျှော်လင့်ပါတယ်။

(၁၃) Myanmar Cracking Team ကို ငွေကြေး တစ်စုံတစ်ရာ ထောက်ပံ့လို့ ရပါသလား။

ပထမအကြိမ် team ကို တည်ထောင်စဉ်က blog.com မှာ အခမဲ့ တင်ခဲ့ပါတယ်။ လက်ရှိဒိုမိန်းကိုလည်း မန်ဘာများ စုပေါင်းပြီး ဝယ်ယူလွှင့်တင်ခဲ့ပါတယ်။ Myanmar Cracking Team ကို ငွေးကြေးတစ်စုံတစ်ရာ ထောက်ပံ့လှူဒါန်းခြင်းဖြင့် team မှာ တစ်စုံတစ်ရာ အကျိုးများမယ်လို့ team အနေနဲ့ မယုံကြည်ပါဘူး။ တကယ်လို့ သင့်အနေနဲ့ လှူဒါန်းလိုခဲ့သည်ရှိသော် တကယ်လိုအပ်နေတဲ့ ပရဟိတလုပ်ငန်းတွေမှာ သွားရောက်လှူဒါန်းနိုင်ပါတယ်လို့ အကြံပြုချင်ပါတယ်။

(၁၄) ခရက်လုပ်တာဟာ တရားဝင်ပါသလား။ ခရက်လုပ်ခြင်းအားဖြင့် အရေးယူခံရနိုင်ပါသလား။

နိုင်ငံတကာစံနှုန်းအရ ခရက်လုပ်ထားတဲ့ဆော့ဖ်ဝဲလ်ကို အသုံးမပြုသရွေ့၊ မဖြန့်ချီသရွေ့တော့ ခရက်လုပ်တာဟာ တရားဝင်ပါတယ်။ ကျွန်တော်တို့လို ဝင်ငွေနည်းပါးတဲ့နိုင်ငံမှာ ဆော့ဖ်ဝဲလ်တွေ ဝယ်မသုံးနိုင်ကြသေးပါဘူး။ ခရက်တွေကို လူတိုင်းသုံးနေကြတုန်းပါ။ တကယ်လို့ ကျွန်တော်တို့လုပ်တာဟာ တရားမဝင်ဘူးလို့ အရေးယူခဲ့မယ်ဆိုရင်တော့ အရေးယူတဲ့သူတွေကိုလည်း တရားမဝင်ဆော့ဖ်ဝဲလ်တွေ သုံးတဲ့အတွက် ပြန်လည် တရားစွဲဆိုရမှာပါ။ ဒါကြောင့် ဒီကိစ္စဟာ ပူစရာမလိုပါဘူး။ Myanmar Cracking Team ဟာ ခရက်တွေကို ငွေကြေးအတွက် ခရက်နေတာ မဟုတ်ဘဲ ပညာရပ်တစ်ခုအနေနဲ့သာ လေ့လာနေခြင်းဖြစ်တဲ့အတွက် ပြည်တွင်းက ဆော့ဖ်ဝဲလ်ရေးသားနေတဲ့  developer တွေအတွက် အကျိုးတစ်စုံတစ်ရာ ထိခိုက်စရာ မရှိဘူးလို့ မြင်ပါတယ်။ ပြည်တွင်းဖြစ်ဆော့ဖ်ဝဲလ်တွေကို ခရက်လုပ်မိလို့ တရားစွဲဆိုခံရရင်တော့ သင့်ရဲ့တာဝန်သာ ဖြစ်ပါတယ်။ တကယ်တော့ ခရက်ကာတွေ၊ ဟက်ကာတွေ ရှိလို့သာ ဆော့ဖ်ဝဲလ် devloping ကဏ္ဍဟာ တရှိန်ထိုး တိုးတက်လာတာ ဖြစ်ပါကြောင်း ….

Myanmar Cracking Team

"



စိတ်ပါဝင်စားသူများ သွားရောက်လေ့လာနိုင်ပါတယ်နော့်။ ကျွန်တော်လည်း လေ့လာနေပါတယ်။


<<  HTAR WAIE THAR  >>

Ko Ko Zaw ( BE-EC )    www.htarwaiethar.blogspot.com