Windows RT ဆိုတာ ဘာလဲ

ယခင်က Windows on ARM လို့လူသိများတဲ့ Windows RT ရဲ့အခြားသော Windows operating system နဲ့ မတူညီတဲ့အချက်ကတော့ Microsoft ကအသိအမှတ်ပြုထားတဲ့ Windows Store ပေါ်က software များနဲ့သာ အသုံးပြုနိုင်ခြင်း ဖြစ်ပါတယ်။ ဒါကြောင့် ARM အသုံးပြု ထုတ်ကုန်တွေပေါ်မှာသာ သုံးနိုင်မယ့် Windows RT နဲ့ပတ်သက်တဲ့ သိထားသင့်တာတွေကို စုစည်းဖော်ပြလိုက်ပါတယ်။

Windows RT ဆိုတာဘာလဲ။

အထက်မှာ ဆိုခဲ့တဲ့အတိုင်း Windows 8 နဲ့ Windows RT ဟာ ကွဲပြားခြားနားပါတယ်။ Microsoft ဟာ Windows 8 ဗားရှင်းတွေကို ယခင် Windows ဖြန့်ချိစဉ်ကထက် ဗားရှင်းများ လျှော့ချထုတ်လုပ်ရန် ရည်ရွယ်ထားတာနဲ့အမျှ Windows RT လို့ခေါ်တဲ့ ARM ပရိုဆက်ဆာတွေပေါ်မှာသာ အသုံးပြုနိုင်တဲ့ Windows 8 ဗားရှင်းကို ပြုလုပ်ခဲ့တာဖြစ်ပါတယ်။


Windows RT နဲ့ WinRT တို့ရဲ့အဓိပ္ပာယ်က တူပါသလား။

အတိုဆုံး ဖြေရမယ်ဆိုရင်တော့ မတူညီပါဘူး။ အကျယ်ချဲ့ပြီး ရှင်းပြရမယ်ဆိုရင်တော့ WinRT လို့ခေါ်တဲ့ Windows Runtime ကို Windows 8 နဲ့ Windows RT နှစ်မျိုးစလုံးပေါ်မှာ အသုံးပြုနိုင်ပါတယ်။ Runtime ဆိုတာဟာ Metro app သစ်များကို ထောက်ပံ့ပေးတဲ့ အင်ဂျင်အတွက် နည်းပညာဆိုင်ရာ အသုံးအနှုန်းဖြစ်ပါတယ်။ ဒါပေမဲ့ Windows Runtime ဆိုတဲ့အသုံးအနှုန်းကို အခုမှ စတင်အသုံးပြုတာ မဟုတ်ပါဘူး။ Hardware တွေနဲ့ အပြန်အလှန် အလုပ်လုပ်နိုင်မယ့် software ကို developer တွေရေးသားနိုင်စေမယ့် application programming interfaces (APIs) ကိုလည်း Runtime ကို ရည်ညွွှန်းခေါ်ဆိုပါတယ်။ Windows RT ကတော့ ARM ပေါ်မှာသုံးနိုင်မယ့် Windows 8 အတွက် Microsoft က ရိုးရိုးရှင်းရှင်း အမည်ပေးထားတာပါ။


Metro ဆိုတာဘာလဲ။

Metro ဆိုတာကတော့ Windows 8 ရဲ့ user interface သစ်ကို ခေါ်ဆိုခြင်းဖြစ်ပါတယ်။ Icon များအစား tile များကို အသုံးပြုထားပြီး အချက်အလက်တွေကို app ကနေ အချိန်နဲ့တစ်ပြေးညီ ဖော်ပြပေးပါတယ်။ ၎င်းတို့ကို WinRT နဲ့ တည်ဆောက်ထားတာဖြစ်ပါတယ်။


WinRT ဆိုတာဘာလဲ။

အခြေခံအားဖြင့် WinRT ဟာ Windows 8 ရဲ့ Metro အပိုင်းကို ကျောထောက်နောက်ခံ ပြုထားတာဖြစ်ပါတယ်။ ဒါပေမဲ့ ၎င်းဟာ Windows developer တွေအတွက် program ရေးဆွဲခြင်းကို ပိုမို ရိုးရှင်းစွာနဲ့ ပြုလုပ်နိုင်စေပါတယ်။ Metro အတွက် coding များဟာ Windows 7 နဲ့အစောပိုင်း Windows အတွက် program တစ်ခုကို ရေးဆွဲခြင်းထက် ပိုမိုလွယ်ကူတာကြောင့် Windows 8 ဟာ developer များကို် ဆွဲဆောင်နိုင်မယ့် နေရာတစ်ခုဖြစ်လာပါတယ်။


Windows 8 နဲ့ Windows RT ဘာတွေကွာခြားသလဲ။

Windows 8 နဲ့ Windows RT မှာ သိသာထင်ရှားတဲ့ ကွဲပြားခြားနားမှုတွေရှိပါတယ်။ ဒီအချက်တွေကပဲ Windows RT ကိုကျရှုံးနိုင်စေပြီး Windows 8 ကို အောင်မြင်မှုရရှိစေနိုင်ပါတယ်။ ကွာခြားချက်များကတော့ အောက်ပါအတိုင်းဖြစ်ပါတယ်။


- Windows RT ကို ARM အသုံးပြု ထုတ်ကုန်တွေပေါ်မှာသာ သုံးနိုင်ပါတယ်။
- Windows RT မှာ Desktop mode ပါ၀င်ပေမယ့် pre-install ကိုတော့ ကန့်သတ်ထားပါတယ်။ Pre-install အနေနဲ့ touch နဲ့သုံးနိုင်မယ့် Microsoft Office (Word, Excel, PowerPoint, OneNote) တို့ကို ထည့်သွင်းပေးထားပါတယ်။
- Windows RT မှာ device encryption ပါ၀င်ပါတယ်။
- x86/x64 program အဟောင်းတွေကိုတော့ Windows RT မှာ အသုံးပြုနိုင်ခြင်းမရှိပါဘူး။


Windows RT မှာ ဘယ်လို app အမျိုးအစားတွေကို အသုံးပြုနိုင်သလဲ

အင်တာနက်ချိတ်ဆက်မှု၊ cloud synchronization နဲ့တုံ့ပြန်နိုင်စွမ်းရှိတဲ့ Metro app တွေကို Windows RT ပေါ်မှာ သုံးနိုင်ပါတယ်။


ARM အသုံးပြု ထုတ်ကုန်အဟောင်းတွေပေါ်မှာ Windows RT ကို အသုံးပြုနိုင်ပါသလား။

အသုံးမပြုနိုင်ပါ။ Windows RT ကို pre-install အနေနဲ့သာ ရရှိနိုင်မှာ ဖြစ်တဲ့အတွက် ARM အသုံးပြုမှု ထုတ်ကုန်အဟောင်းတွေပေါ်မှာ အသုံးပြုနိုင်ခြင်းမရှိပါဘူး။


ARM ရဲ့ အကျိုးကျေးဇူးက ဘာတွေလဲ

ARM ပရိုဆက်ဆာတွေဟာ စျေးကွက်ထဲမှာရှိတဲ့ iOS, Android နဲ့ အခြားသော မိုဘိုင်းထုတ်ကုန်တွေမှာ အသုံးပြုထားပါတယ်။ ၎င်းဟာ ဘက်ထရီစွမ်းအင် ထိန်းချုပ်မှုအပိုင်းမှာ ကောင်းမွန်တဲ့အတွက် ကျယ် ကျယ်ပြန့်ပြန့် အသုံးပြုကြခြင်းဖြစ်ပါတယ်။


Windows RT မှာ အားနည်းချက်များရှိသလား။

Windows 8 မှာ အသုံးပြုတဲ့ core API တွေကို Microsft က Windows RT မှာအသုံးပြုမှု ကန့်သတ်ထားပါတယ်။ ဒီအချက်ဟာ browser ကုမ္ပဏီများအကြား အံ့အားသင့်ဖွယ်ရာဖြစ်ခဲ့သလို Microsoft အနေနဲ့လည်း Apple က iOS ကို ထိန်းချုပ်ထားသလိုမျိုး Windows RT ကိုထိန်းချုပ်ကာ browser ဆန်းသစ်တီထွင်မှုများကို လျှော့ချရန် ကြိုးပမ်းဖွယ်ရှိပါတယ်။ နောက်အားနည်းချက် တစ်ခုကတော့ Windows RT အတွက် OEM လိုင်စင်ဟာ အမေရိကန်ဒေါ်လာ ၈၀ ခန့် ကျသင့်ဖွယ်ရှိပါတယ်။ ဒီအချက်ဟာ WindowsRT ရဲ့စျေးနှုန်းကို အခြားသော Android ထုတ်ကုန်များထက် ကြီးမြင့်စေမယ့် အချက်ဖြစ်ပါတယ်။ ဒါ့အပြင် Windows RT tablet ဟာ Windows 8 tablet နဲ့အမြင်အားဖြင့် တူညီနိုင်တဲ့အတွက် ၀ယ်ယူသူများအနေနဲ့ စိတ်ရှုပ်ထွေးစရာဖြစ်နိုင်ပါတယ်။



Credit :: Unknown


Posted By

<<  HTAR WAIE THAR  >>

Ko Ko Zaw ( BE-EC )    www.htarwaiethar.blogspot.com